Почнува снимањето на долгометражниот филм „Татко“

02/07/2014

Денес во Охрид започнува снимањето на играниот филм „Татко“ - копродукција помеѓу Германија, Косово и Македонија и режисерско деби на Висар Морина, кој е и автор на сценариото.

„Татко“, преку уникатниот лик на Нори, десетгодишното момче кое е приморано прерано да созрее, дава еден поинаков приказ на Косово во деведесеттите години на минатиот век. Нори претрпува големи загуби и храбро се соочува со потезите на судбината. Но, по прераната смрт на неговата мајка, тој не може да прифати да биде напуштен и од својот татко Гзим. Нориевата детска истрајност покажува екстремна длабочина, што ја издигнува над приказната на еден бегалец или политичкиот контекст на Косово.

Скопје Филм Студио, Нико Филм од Германија и Круша Продуксиони од Косово се продукциските куќи одговорни за реализација на проектот „Татко“, за што добија финансиска поддршка од страна на национални филмски фондови: West German Broadcasting (WDR), Film und Medienstiftung (NRW), German Federal Film Board (FFA), Косовскиот Филмски Центар и Агенцијата за филм на РМ.

На филмот работи интернационална екипа, во која секоја од земјите копродуценти е застапена со свои автори. Охрид и околината беа одбрани како најсоодветни за сцените чие снимање е предвидено да трае една недела. 

Проектот доби огромна поддршка и од страна на Општина Охрид, Министерството за одбрана и Генералштаб на АРМ, Министерството за внатрешни работи, Министерството за транспорт и врски и Капетанијата на пристаништата Охрид.