Агенцијата за филм на Р.Македонија потпиша договор за развој на копродукциски проекти помеѓу Италија и Македонија

03/09/2015

Денес со почеток во 12:00 часот во Италијанскиот Павилион – Сала Тропикана (Хотел Excelsior) во склоп на 72-то издание на Меѓународниот филмски фестивал Венеција, Дарко Башески, директор на Агенцијата за филм на Република Македонија и Никола Борели, генералниот директор на Дирекцијата за филм при Министерството за културно наследство и туризам потпишаа Договор за развој на копродукциски проекти помеѓу Италија и Македонија.

Со потпишување на овој договор двете земји го поттикнуваат заедничкиот интерес за финансисрање на проекти во развој на долгометражни филмови (игран, документарен и анимиран филм) чие сценарио има висок квалитет и  комерцијален потенцијал да ги привлече гледачите од двете земји како и гледачите од  остатокот од светот. Со овој договор е дефинирано дека при развој на копродукциски проект меѓу двете земји, продуцентот од домашната земја може да аплицира за поддршка според овој договор. Продуцентите мора да работат во согласност со законодавството на Република Македонија и законските регулативи воспоставени од Агенција за филм како и соодветно со италијанското законодавство и упатствата на Дирекцијата за филм при Министерството за културно наследство и туризам.

Вкупниот буџет за развој на копродукциски проекти помеѓу двете држави е 60.000 евра на годишно ниво , односно по 30.000 евра од секоја земја.

Утре (04.09.2015 год, петок), во рамките на 72-то издание на Меѓународниот филмски фестивал Венеција, филмот „Банат’’ во режија на Адриано Валерио, ко-продукција помеѓу Италија, Македонија, Романија и Бугарија ќе ја одржи својата официјална премиера. Филмот „Банат’’ е поддржан како малцинска ко-продукција од страна на Агенцијата за филм на Република Македонија. Дел од овој филм минатата година во тек на дваесетина дена се снимаше во нашата земја.

Галерија